SMNI NEWS CEBU-VISAYAS | Mga Homegrown Brands sa Visayas, Gipasiugdahan ang Franchise Growth sa Visayas Franchise Conference

Posted by: SMNI NEWS CEBU-VISAYAS Facebook Page.

Gipakita sa mga negosyanteng taga-Visayas ang ilang kalampusan sa pagpalambo sa lokal nga mga brand ngadto sa nasudnong lebel atol sa unang Visayas Franchise Conference 2026 nga gipahigayon karong Hulyo 30, 2026 sa Summit Galleria Cebu.

Uban sa temang “Igniting Growth: Visayas and Beyond,” ang kalihokan gi-organisa sa Philippine Franchise Association (PFA) isip kabahin sa Franchise Negosyo Visayas Expo sa Mountain Wing sa SM Seaside City Cebu.

Gipasiugda sa maong komperensya ang mga istorya sa mga homegrown brands nga nagsugod lamang sa gagmay nga tindahan sa Visayas apan nakahimo og pagpalapad sa ilang negosyo sa tibuok Pilipinas ug bisan sa internasyonal nga merkado.

Matod ni Mr. Kenneth Lim, Chair sa Visayas Franchise Conference, Presidente sa Dessert Factory, ug PFA Regional Director for Central Visayas, ang tumong sa kalihokan mao ang pagdasig sa mga negosyante nga dili limitahan sa lokasyon ang ilang pangandoy sa pagpalambo sa negosyo.

“Ang mga brand nga ania sa entablado wala natawo sa Makati o Ortigas. Nagsugod sila dinhi sa Cebu, Iloilo, ug Mandaue—gikan sa usa ka stall o usa ka tindahan. Ang importante mao ang sistema, disiplina, ug kahibalo unsaon pagpalapad,” matod ni Lim.

Lakip sa mga prominenteng mamumulong mao si Mr. Steve Benitez, Chairman ug CEO sa Bo’s Coffee, nga nagsugod ang unang tindahan sa Cebu City, uban ni Mr. Angelo Jose Gandionco, Chief Operating Officer sa Julie’s Bakeshop nga gitukod sa Mandaue City.

Sa sesyon nga “Franchising the Right Way,” mipakigbahin usab si Mr. Johnny Que, Presidente sa Waffle Time nga nagsugod sa Iloilo City niadtong 1998, ug si Mr. Terence Neil S. Padrique, CEO ug Presidente sa The Lemon Co., nga nagsugod gikan sa gamay nga lemonade stall sa Cebu.

Sumala sa PFA, ang maong komperensya nagtumong sa paghatag og inspirasyon ug praktikal nga kahibalo sa mga negosyante sa Visayas aron ilang mapalambo ang ilang mga lokal nga produkto ug serbisyo ngadto sa mas halapad nga merkado.

Gipakita sa kalihokan nga ang Visayas dili lamang merkado, kondili tinubdan usab sa dagkong mga brand nga adunay potensyal mosakop sa tibuok kalibutan.

I via Jimrey Biosa 

SMNI NEWS CEBU-VISAYAS | View poste here.